නව ලොවේ ඔබේ තාක්‍ෂණික සේවාවන්ට ගැළපෙන සුපිරිම ආරක්‍ෂණ ක‍්‍රමවේදයක් ලෙස Face Recognition වැදගත් වන්නේ කෙසේ ද?

කිසියම් සේවාවක් වෙත පිවිසීමට මුරපදයක් භාවිත වූ යුගය පසුකරමින් ඒ සඳහා ඇඟිලි සළකුණු තාක්‍ෂණය භාවිත කරන යුගයක් වෙත අපි පැමිණ සිටියෙමු. ඉන් නොනැවතී ඉදිරියට පැමිණි මිනිසා එම යුගය පසුකර ඇසේ තාරා මණ්ඩලය පරිලෝකනය කරන තාක්‍ෂණයක් වෙත පැමිණි බවද අපි දනිමු. මින් ඉදිරියට ද අප පැමිණ නැතැයි කිවහොත් එය හිතළුවක්ම පමණකි. ඒ සම්පූර්ණ මුහුණ හඳුනාගැනීම (Face Recognition) තුළින් සිය අනන්‍යතාවය තහවුරු කරන උසස් තාක්‍ෂණයක් මෑතකදී එළිදක්වන ලද දුරකථන තුළින් හඳුන්වා දී ඇති බැවිණි.

කෙසේනමුත්, කාර්යබහුල බව සහ දැනට පවත්නා සේවාවන්ගේ සංකීර්ණත්වය වැඩිවීමත් සමග දිගු මුරපදයක් ටයිප්කිරීම බොහෝදෙනකුට කරදරයක් බවට පත්ව ඇති අතර, පරිගණක හැකර්වරුන්ගේ පහරදීම දිනෙන්දින වැඩිවෙන බැවින් වඩාත් ඵලදායී අන්දමින් අනන්‍යතාවය තහවුරු කිරීමේ ක‍්‍රමවේදයක් භෞතික උපාංගවලට මෙන්ම අන්තර්ජාලය තුළ ඇති සේවාවන් සඳහා ද ඉතා විශාල අවශ්‍යතාවයක් බවට පත්වී ඇත.

මුරපද මතක තබාගැනීමේ LastPass වැනි සේවාවන් බොහෝමයක් මේ වනවිට බිහිවී තිබුණත් උපරිම පරිශීලක අත්දැකීමක් ලබාදීමේදී තිරය මත කිසිඳු විධානයකින් තොරව, සේවාව වෙත අනන්‍යතාවය තහවුරු කර පිවිසීමට ඉඩ ලබාදීමට නම් මුරපදයකට එහාගිය තාක්‍ෂණයක් නිතැතින්ම අවශ්‍ය වේ. ලොව බොහෝ දියුණු රටවල අපරාධකරුවන් හඳුනාගැනීම සඳහා මෙම තාක්‍ෂණය බහුලව යොදාගැනෙන අතර සීසීටීවී කැමරා දර්ශන වැනි සාක්‍ෂිවලින් අපරාධකරුවන්ගේ අනන්‍යතාවය තහවුරු කරගැනීම මේ වනවිටත් සිදුවෙමින් පවතී. විශේෂයෙන්ම Federal Bureau of Investigation (FBI) ආයතනය මේ වෙනුවෙන් විශේෂ මෘදුකාංග ද නිපදවා තිබෙන අතර, අපරාධ විමර්ශනය සඳහා ඒවා උපයෝගී කරගනු ලබයි. ජාතික ආරක්‍ෂාව වැනි මාතෘකාවකදී මුහුණු සළකුණු යනු ඉතාම සංවේදී සහ ඉහළ නිරවද්‍යතාවයකින් යුතුව ප‍්‍රතිඵල ලැබියහැකි ක‍්‍රමවේදයකි.

IEEE Computer Vision සමුළුවේදී ෆේස්බුක් සමාගමේ DeepFace පද්ධතියට දුන් ඡායාරූප දෙකක සිටින පුද්ගලයන් සියයට 97ක නිරවද්‍යතාවයකින් යුතුව හඳුනාගැනීමට හැකියාව තිබිණි. FBI ආයතනයටත් වඩා ඉහළ නිරවද්‍යභාවයක් ෆේස්බුක්වලට ලැබීම පුදුමයට කරුණක් නොවන්නේ ෆේස්බුක් සතුව බිලියන 250කටත් වැඩි ඡායාරූප ගබඩාවක් පවතින විට FBI සතුව ඡායාරූප මිලියන 50ක් පමණ දත්ත ගබඩාවක් පවතින බැවිණි.

එමෙන්ම, කිසිඳු ආයාසයකින් තොරව දිනෙන්දින ෆේස්බුක්හි ජායාරූප ප‍්‍රමාණය ඉහළ යන බැවින්, ෆේස්බුක් ඉංජිනේරුවන්ට ඒ අතරින් හොඳ ඡායාරූප සොයාගන්නට මෙන්ම අත්හදාබැලීමට ඉතා විශාල ප‍්‍රමාණයක දත්ත මූලාශ‍්‍ර ඒ තුළින් ලැබේ. මෙම තාක්‍ෂණය හැකර්වරුන්ට මැදිහත් විය නොහැකි ආකාරයේ ආරක්‍ෂණයකින් සමන්විත බව ෆේස්බුක් සමාගම වැඩිදුරටත් සපථ කරන අතර, මෙය වැඩිදියුණු කරමින් ෆේස්බුක්හි මුල් පිටුවට ද අනාගතයේදී පාස්වර්ඞ් වෙනුවට මුහුණු සළකුණු භාවිතය පැමිණිය හැකි බව ද ඔවුන් පවසයි. දුරකථන භාවිතය දැනටමත් ශීඝ‍්‍රයෙන් ඉහළයමින් පවතින යුගයක සහ අඳුරේදී ද සුපිරි ඡායාරූප ගතහැකි ආකාරයේ ඉහළ ගුණාත්මකබවකින් යුතු හැකියාවන් පවතිනවිට මෙවැනි ක‍්‍රමවේදයකට යාම කිසිසේත්ම අගතියක් නොවනු ඇත. එමෙන්ම, මෙම මුහුණු සළකුණු ක‍්‍රමවේදය පවතිනවිට හුදෙක් එය මුහුණු සළකුණු ආරක්‍ෂණයට සීමා නොවන අතර දෙවැනි ආරක්‍ෂක මට්ටමක් ලෙස ඇසේ තාරා මණ්ඩල පරිලෝකනය, ඇඟිලි සළකුණු, PIN සහ මුරපද භාවිතයට ද ඉඩසලසා ගතහැකිය.

අද වනවිට මෙම ජෛවමිතික තාක්‍ෂණය අපරාධ විමර්ශන කටයුතුවලටම පමණක් සීමා නොවී එදිනෙදා අප භාවිත කරන උපකරණවලටත් ළඟාවෙමින් සාමාන්‍ය දෙයක් බවට පත්වීම අනාගතය සුබදායී කිරීමට හේතුවක් වියහැකිය.