“sleep is expendable” නම් ආකල්පය ඉවත්කිරීම සඳහා ජපානයේ නැඹුරුව

පරිවර්තනය: ධනංජි සමරකෝන් 

ලෝකයේ බොහෝ රටවල රැකියාවට ගොස් නිදාගැනීමට අවස්ථාවක් ලබා නොදෙන නමුත්, ජපානයේ බොහෝ කම්කරුවන් සඳහා කාර්යාලයීය ජීවිතයේ කොටසක් බවට නින්ද පත්වී ඇත. සැබැවින්ම මෙය ජපානයේ සුවිශේෂී පරිවර්තනයකි.

මන්ද දිගුපැය ගණනක් වැඩකරන සංස්කෘතියක් සඳහා ප‍්‍රසිද්ධියක් උසුලන ලද ජපානයේ සමාගම්හි යහපත උදෙසා කම්කරුවන් සිය පෞද්ගලික අවශ්‍යතාවයන් පවා කැපකරමින් අඛණ්ඩ සේවාවක් සැපයීම සමාගම කෙරෙහි සේවකයාගේ පවත්නා දිගුකාලීන පක්‍ෂපාතීත්වය සහ කැපවීම පිළිබඳ සංඥාවක් ලෙස දුටුවහ.

එබැවින් “කරෝෂී” (Death by overwork) ලෙස ජපානයේ හැඳින්වෙන පරිදි, සේවකයින් පීඩනය දරාගත නොහැකිවීම නිසා සියදිවි නසාගැනීම හෝ දිගු කාලයක් අඛණ්ඩව සේවය කිරීම නිසා හෘදයාබාධවලින් සහ අධික ලෙස නින්ද නොමැතිවීම නිසා ජපානයේ බොහෝ පිරිසකට මරණය හිමිවිය. එහෙත් අද වනවිට බොහෝ ජපන් සමාගම් මෙම තත්ත්වය නැතහොත් රැකියාව සහ නින්ද සමග පවත්නා සම්බන්ධතාවය වෙනස්කිරීම සඳහා පියවර ගනිමින් සිටී.

ටෝකියෝවේ, විවාහ සැලසුම් කරන සමාගමක් වන Carzy පැය 6ක කාලයක් රාත‍්‍රියට සිය සේවකයින්ට නිදාගැනීමට අවස්ථාව ලබාදීමට ආරම්භ කළේය. ඉන්පසු වාර්තා වන්නේ තොරතුරු තාක්‍ෂණ සමාගමක් වන Nextbeat ඔවුන්ගේ කාර්යමණ්ඩලයට මද වේලාවක් නිදාගැනීමට අවශ්‍ය කාමර සකස්කර දී ඇති බවයි.

ප‍්‍රමාණවත් නින්දක් නොලැබීමෙන් අධික රුධිර පීඩනය, ආඝාතය සහ මානසික අවපීඩනය වැනි සෞඛ්‍ය ගැටලු රාශියකට මුහුණපෑ හැකිය. අධික ලෙස නින්ද අහිමිවීමෙන් ව්‍යාකූලත්වයට, ප‍්‍රජානන කි‍්‍රයාකාරිත්වයේ හිඟකමට මෙන්ම අවසානයේදී මරණය වුුවද අත්පත් විය හැකිය. එය වධහිංසා ක‍්‍රමයක් ලෙස පවා භාවිත කර ඇත.

2013 වසරේදී 31 හැවිරිදි මාධ්‍යවේදිණියක වන මීවා සාදෝ හෘදයාබාධයකින් මියගියේ මාසයක් වැනි කාලයක් තුළ අතිකාල පැය 159ක් වැඩ කිරීමෙන් නොව, දින දෙකක් පුරා එකදිගට විවේකයක් නොමැතිව සේවය කිරීමෙනි. 2017 වසරේදී ෆුකුෂිමා න්‍යෂ්ටික බලාගාරයේ සේවය කළ 57 හැවිරිදි තදාකි ඉගාරී, මාරාන්තික ලෙස ආතතියෙන් මිය ගියේය. ඔහු ද අතිකාල සේවාවක් කර තිබූ අතර ඔහුගේ මරණයට පෙර මාසයේ අතිකාල පැය 100ක් අඛණ්ඩව සේවය කර තිබුණි. මෑතකදී ප‍්‍රකාශයට පත්කරන ලද එරට ආණ්්ඩු නිවේදනයකින් ගුරුවරුන් හා වෛද්‍ය  කාර්යමණ්ඩලය කරෝෂී අවදානමකට ලක්වීමේ වැඩි අවකාශයක් පවතින බවට අනතුරු අඟවන ලදී.

ටෝකියෝ Crazy සමාගමේ ප‍්‍රධාන විධායක නිලධාරී, කෂුෂිකෝ මොරියාම් බ්ලූම්බර්ග් වෙත පවසා ඇත්තේ, ඔවුන්ගේ සමාගමට එවැනි තත්ත්වයක් සම්බන්ධයෙන් බියවිය යුතු නැති බවත්, කම්කරු අයිතිවාසිකම් සුරැකිය යුතු බවත්, එසේ නොමැති වුවහොත් රට දුර්වල වන බවත්ය. ඔහුගේ මෙම ප‍්‍රකාශයෙන් පිළිඹිඹු වන්නේ, සෞඛ්‍යය සහ යහපැවැත්මට ඉහළින්ම ප‍්‍රමුඛත්වය ලබාදීම කෙරෙහි ජපානයේ වර්ධනය වෙමින් පවත්නා නැඹුරුවයි.

එමෙන්ම, ජපන් සෞඛ්‍ය අමාත්‍යාංශය “sleep is expendable” ආකල්පය ඉවත්කිරීම සඳහා සේවායෝජකයන්ට මාර්ගෝපදේශන ලබාදෙමින්, නින්දෙහි පවත්නා වැදගත්කම සහ වඩාත් හොඳින් විවේකගත වූ නිදහස් ශ‍්‍රම බලකායේ ප‍්‍රතිලාභ පෙන්වාදෙයි.

Japanese Society of Sleep Research මගින්  අනතුරු අඟවමින් හෙළිකරනු ලැබුවේ, ජපානයේ වැඩිහිටි පිරිමින්ගෙන් සියයට 71ක්ම පුරුද්දක් ලෙස සෑම රාති‍්‍රයකම නිදාගන්නේ පැය 7කට වඩා අඩු කාලයක් බවයි. කණස්සල්ලට කාරණයක් නම් ජපානයේ වැඩිහිටියන්ගෙන් සියයට 30ක් පමණ නින්දට යෑමට පෙර ඇල්කොහොල් භාවිත කරනු ලැබීමයි. එබැවින්, අනාගතයේදී තවත් සෞඛ්‍ය ගැටලු ඒ හරහා ඇතිවිය හැකිය.

2009 වසරේදී, Rand  නම් පර්යේෂණ ආයතනය විසින් කළ අධ්‍යයනයක් මගින් නින්ද නොමැතිවීම නිසා අහිමිවන පිරිවැය ගණනය කිරීමට උත්සහ කළේය. ඒ අනුව, සෞඛ්‍යය සහ ඉහළ මරණ අනුපාතය ජපාන ආර්ථිකයට ඩොලර් බිලයන 138ක ඵලදායිතා අලාභයක් සිදුකරන ලද අතර, එය දළ දේශීය නිෂ්පාදනයෙන් සියයට 3කට ආසන්න අහිමි කිිරීමකි.

ෂොන් ප්ලෙමින්ග් නම් ජ්‍යෙෂ්ඨ ලේඛකයා විසින් “To combat Japan’s sleep debt, some firms allow tired workers to nap on the job” නමින් ලෝක ආර්ථික සංසද වෙබ් අඩෙවියේ පළකළ ලිපියට එක්කළ සිංහල පරිවර්තනයකි.