සැබවින්ම ඩිජිටල් නායකත්වය වැදගත් වන්නේ ඇයි?

සටහන: ධනංජි සමරකෝන්

සමාගම් නව්‍යකරණය වීමත් සමග ඩිජිටල් හැකියාවන් වර්ධනය කරගැනීම සහ ඊට අවශ්‍ය ක‍්‍රමෝපායයන් සැලසුම් කිරීම මෙන්ම කුසලතා කළමනාකරණය කිරීමේ ප‍්‍රයත්නයන් ආදිය හේතුවෙන් ව්‍යාපාර සංස්කෘතිය ඊට අනුව හැඩගස්වාගැනීමට අවශ්‍ය ක‍්‍රමෝපායයන් වෙත නැඹුරුවීම යුගයේ අවශ්‍යතාවයකි. ඩිජිටල් නායකත්වයක් අවශ්‍ය වන්නේ මෙම පසුබිම මතිනි.

සැබැවින්ම, ඩිජිටල් නායකත්වය වැදගත් වන්නේ ඇයි? හතරවෙනි කාර්මික විප්ලවය හේතුවෙන් අද දවසේ පෙර නොවූ විරූ වෙනස්කම්වලට සහ අභියෝගාත්මක අනාගතයකට මුහුණදීමට සමාගම්වලට සිදුව තිබේ. මෙම විප්ලවය නව තාක්‍ෂණික දියුණුවේ ප‍්‍රවර්ධනය මත ගමන් කරන්නකි. එවැනි පසුබිමකදී නායකත්වය තුළින් අන් කවරදාකටත් වඩා විශාල භූමිකාවක් ඉටුවිය යුතුව ඇත. එබැවින්, අසමගිකම්, ව්‍යාකූලත්වයන් සහ බාධාකිරීම් පසුකර යන නායකත්වයක් නිර්මාණය වීම අත්‍යාවශ්‍ය වෙයි. සෑමකෙනෙකුටම පරිපූර්ණ අනාගතයක් නිර්මාණය කරන පද්ධති නිර්මාණය කිරීම සහ ගොඩනඟා ගැනීමට අවශ්‍ය වන බැවින් ඩිජිටල් නායකයින්ගේ භූමිකාව කැපී පෙනේ. මෙහිදී අප සලකා බලනුයේ සෑම මට්ටමකටම ඔරොත්තු දෙන නායකයින් නිර්මාණය කරගැනීමට අවශ්‍ය මූලෝපායයන් මොනවා ද යන්න සාකච්ඡා කිරීමයි.

සහභාගීත්වය සහ වගවිය යුතුබව ගොඩනැගීම

ඩිජිටල් ආර්ථිකය ශීඝ‍්‍ර ලෙස වර්ධනය වෙමින් පවතී. නමුත් නායකයා යනු සියල්ලම දන්නා අයෙක් විය නොහැක. එබැවින් ස්වාධීනත්වය සහ නිදහස් තීරණ ගැනීමට කටයුතු කරමින් සිය රාජකාරිය කිරීමට නායකයින් තමන්ගේ කණ්ඩායම් දිරිමත් කළ යුතුය. පහළ ස්ථරයේ සිටින සේවකයින්ගෙන් දැනුම ලබාගැනීම, ඔවුන්ගෙන් එලදායී යෙදවුම් පෙරාගැනීම සහ ඔවුන් කෙරෙහි විශ්වාසය තැබිය හැකි නායකයින් ඇතිවිය යුතුය.

එමෙන්ම, කණ්ඩායමේ සෑම සාමාජිකයෙකුටම ආයතනයේ අරමුණ සාක්‍ෂාත් කරගැනීම සඳහා අදහස්, අවබෝධය සහ දැනුම ලබාගැනීමට දිරිමත් කළ යුතුය.

පැහැදිලි අරමුණක් වෙත කණ්ඩායම එක්තැන් කරගැනීම

අපගේ එදිනෙදා ජීවිතය තුළ තාක්‍ෂණය වැඩි වැඩියෙන් භාවිත වන අතර, ඉන් මිදෙන්නට අපට නොහැකිය. නායකත්වය තුළින් අරමුණු සහ සන්නිවේදනයට අවශ්‍ය මඟපෙන්වීමක් අවශ්‍ය වේ. එබැවින්, නායකයින්ට ආකර්ශනීය දැක්මක් තිබිය යුතු අතර, අන් අයට අවබෝධ කරගත හැකි පරිදි පැහැදිලිව සන්නිවේදනය කිරීමේ හැකියාවක් පැවතිය යුතුය. මන්ද තම අරමුණ කුමක්දැයි යන්න කණ්ඩායමට නිසිලෙස ග‍්‍රහණය කරවීමට නායකයාට හැකිවිය යුතු බැවිණි.

අත්හදාබැලීම හා නවෝත්පාදන වෙනුවෙන් පුද්ගලයින් බලගැන්වීම

නිර්මාණශීලිත්වය යනු නායකයින්ට ඉහළට ගමන් කිරීමට දායක වන ප‍්‍රබල බලවේගයයි. වර්තමානයේ පවත්නා පරස්පරතාවන්, ගැටලු වෙත අවධානය යොමුකරමින් ඉදිරි අනාගතය දර්ශනය කර, එය මාර්ගගත කිරීමට නායකයාට හැකිවිය යුතුය.

එබැවින්, නායකයින් විසින් නව්‍යකරණය සහ අත්හදාබැලීම් කළයුතු අතර, ගතික අවශ්‍යතා සපුරාලීම සඳහා අඛණ්ඩව ගවේෂණ සිදුකළ යුතුය. එමෙන්ම, අත්හදාබැලීම මෙන්ම කණ්ඩායම මුහුණදෙන පරස්පරතාවයන් හා ඝට්ටනයන් පාදක කරගනිමින් ඒවාට අවශ්‍ය විසඳුම් මගින් නවෝත්පාදනයන් සිදුකරන්නට ද නායකයාට හැකිවිය යුතුය.

නිවැරැදි තීරණගැනීම

විශේෂයෙන්ම, ඩිජිටල් ආර්ථිකයේ සාර්ථකත්වය සහ අසාර්ථකත්වය තීරණය වන්නේ පවත්නා තත්ත්වය තුළ නිතර නිතර සිදුවන වෙනස්කම්වලට මුහුණදිය හැකි ලෙස සිය කණ්ඩායම ජවසම්පන්න ලෙස සකස්කිරීම තුළිණි. අප සිදුකරන ව්‍යාපෘති සෑමවිටම සාර්ථක ව්‍යාපෘතිම නොවිය හැකියි. එබැවින් අසාර්ථක අවස්ථාවන් මැඩපවත්වා ගනිමින් කණ්ඩායම නැවත නගාසිටුවීමට නායකයෙකුට හැකිවිය යුතුයි.

එමෙන්ම, අතීතයේ සාර්ථකත්වය සඳහා අවියක් කරගත් කිසියම් දෙයක් අනාගතයේ සාර්ථක්වයට නොගැළපෙන්නක් වියහැක. එබැවින් අනාගතයට යෝග්‍ය වන පරිදි සිය කණ්ඩායමේ නිපුණතා සහ හැකියාවන් සවිබලගැන්වීමට නායකයාට හැකිවිය යුතුය.

2018දී ඉදිරිපත් කරන ලද ලෝක ආර්ථික සංසදයේ අනාගත රැකියා වාර්තාව (Future Job Report) මගින් පෙන්වාදෙනුයේ, 2022 වනවිට නැවත සියලුම සේවකයින්ගෙන් සියයට 54කට නොඅඩු ප‍්‍රතිශතයකගේ හැකියාවන් ඉහළ දැමිය යුතු බවයි. මේ අතරින් සියයට 35ක් වැනි පිරිසකට මාස හයක පුහුණුවක් අවශ්‍ය වන අතර, සියයට නවයක් සඳහා මාස 6ත් 12ත් අතර පුහුණුවක් ද, සියයට 10කට වසරකට වැඩි කාලයක අතිරේක හැකියා පුහුණුවක් ද අවශ්‍ය වේ.

ඉදිරියේ පවත්නා අභියෝග

ස්වීඩනයේ දේශීය සිල්ලර වෙළඳසැලක් වන IKEA සමාගම 1943දී ආරම්භ වූ අතර, එය යුරෝපය පුරා ව්‍යාප්තවීමට වසර 30ක පමණ කාලයක් ගතවිය. එමෙන්ම, එය ආරම්භ වී දශක හතකට පසුත් එහි ආදායම වූයේ ඩොලර් බිලියන 72කි. නමුත්, චීනයේ E-commerce සමාගමක් වන අලිබබා සමූහ ව්‍යාපාරය වසර දෙකක් තුළ මිලියනයක පමණ පිරිසක් වෙත ව්‍යාප්ත වෙමින් වසර 15ක් තුළ ඩිජිටල් තාක්‍ෂණය හරහා මිලියන 15කට වැඩි අන්තර්ජාල වෙළඳුන් පිරිසක් සහ වාර්ෂික විකුණුම් ඩොලර් බිලියන 700ක් උපයාගන්නා ලදී.

මේ අතර, පසුගිය වසරේ මිලියනයක් පමණ වන ෆේස්බුක් පරිශීලකයින් පිරිසකගේ දත්ත නිරාවරණය වී ඇති නිසා, ඩිජිටල් ආර්ථිකය පිළිබඳව ඉන් බරපතල ගැටලුවක් මතු කළේය. එනම් ඩිජිටල් ලෝකයේ සිදුවන කඩාවැටීමක් අතිශය භයංකර වන අතර, සමස්ත ව්‍යාපාර ලෝකයෙහි කි‍්‍රයාකාරිත්වය කෙරෙහි බලපෑම් කිරීමට ඊට හැකියාවක් පවතින බවයි. ප‍්‍රතිපත්ති සම්පාදකයින්, ආණ්ඩු සහ ඩිජිටල් නායකයින්ගේ සිට සියලුම පාර්ශ්වයන් මෙම අවදානම් සහගත තත්ත්වයන් විශ්ලේෂණය කර ඒවා අවමකිරීම සඳහා විසඳුම් සෙවිය යුතුය.