ශ‍්‍රී ලංකා ජනාධිපති අතිගරු මෛත‍්‍රීපාල සිරිසේන මැතිතුමා ඊයේ දින (17/10) යාපනය ජාත්‍යන්තර ගුවන් තොටුපොළ විවෘත කළේය. ශ‍්‍රී ලංකා අග‍්‍රාමාත්‍ය අතිගරු රනිල් වික‍්‍රමසිංහ මැතිතුමා ද මෙම අවස්ථාවට සහභාගී විය. මෙම ඓතිහාසික අවස්ථාව සනිටුහන් කරමින් ඉන්දීය සම්භාවනීය අමුත්තන් රැගත් මංගල ගුවන් යානය චෙන්නායි සිට යාපනය ගුවන් තොටුපොළ වෙත ළඟාවිය. එයාර් ඉන්ඩියා (Air India) අනුබද්ධිත එලායන්ස් එයාර් (Alliance Air) සමාගම විසින් ATR72-600 කෙටිදුර ගුවන් යානය සේවයේ යොදවා ඇති අතර එය එලායන්ස් එයාර් සමාගමේ ප‍්‍රථම ජාත්‍යන්තර ගුවන් යානයයි.

ශ‍්‍රී ලංකාවේ ප‍්‍රවාහන සහ සිවිල් ගුවන් සේවා අමාත්‍ය ගරු අර්ජුන රණතුංග මැතිතුමා, වෙනත් අමාත්‍යවරුන් සහ පාර්ලිමේන්තු මන්ත‍්‍රීවරුන් රැසක්, උතුරු පළාත් ආණ්ඩුකාර ආචාර්ය සුරේන් රාඝවන් මැතිතුමා, ශ‍්‍රී ලංකාවේ ඉන්දීය මහ කොමසාරිස් ගරු තරංජිත් සිං සන්ධු මැතිතුමා, එයා ඉන්ඩියාහි ප‍්‍රධාන කළමනාකාර අධ්‍යක්‍ෂ අශ්වානි ලොහානි මහතා, එලායන්ස් එයාර්හි ප‍්‍රධාන විධායක නිලධාරි සී.එස්. සුබයියා මහතා, යාපනයේ ඉන්දීය කොන්සාල් ජෙනරාල් එස්. බාලචන්ද්‍රන් මහතා, ශ‍්‍රී ලංකා ත‍්‍රිවිධ හමුදා සාමාජිකයින් සහ ශ‍්‍රී ලංකා සහ ඉන්දීය රජයේ නිලධාරීන් සමාරම්භක අවස්ථාවට සහභාගී වූහ.

මෙම අවස්ථාව අමතමින් මහ කොමසාරිස්වරයා ප‍්‍රකාශ කළේ, ඉන්දියාව සහ ශ‍්‍රී ලංකාව අතර ද්විපාර්ශවික සම්බන්ධතා සැබවින්ම අහස සිපගත් බවයි. මෙම මංගල ගුවන් යානය ශ‍්‍රී ලංකාව තුළ ජනතා කේන්ද්‍රීය සංවර්ධන ව්‍යාපෘතීන් තවදුරටත් ක‍්‍රියාත්මක කිරීමට ඉන්දියාව දරන කැපවීම සඳහා තවත් නිදසුනක් බව එතුමා සඳහන් කළේය. එසේම, මෙතුළින් ද්විපාර්ශවික සම්බන්ධතාවයේ හදවත බඳු දෙරටෙහි ජනතාව අතර තිබෙන සබඳතා තවදුරටත් ශක්තිමත් කිරීමට දෙරටම ගන්නා උත්සහය පිළිඹිබු වන බව එතුමා ප‍්‍රකාශ කළේය. ඉන්දීය අග‍්‍රාමාත්‍ය නරේන්ද්‍ර මෝදි මැතිතුමා 2015 වසරේදී සිදුකළ ශ‍්‍රී ලංකා සංචාරය අතරතුර සිදුකළ “මා ඉන්දියාව වෙනුවෙන් සිහින දකින අනාගතය මා හට ඉන්දියාවේ අසල්වැසි රාජ්‍යයන් සඳහා ද අවැසි අනාගතය වේ” යන ප‍්‍රකාශය මහ කොමසාරිස්වරයා මෙහිදී සිහිපත් කළේය.

ශ‍්‍රී ලංකා රජය සමග 2005 නොවැම්බර් මාසයේ ඇති කරගත් අවබෝධතා ගිවිසුම යටතේ පලාලි ගුවන් තොටුපොළේ ධාවන පථය සංවර්ධනය කිරීම සඳහා ඉන්දියානු රජය මින් පෙර මූල්‍ය ප‍්‍රදාන ලබා දී තිබිණි. යාපනයේ සිට කලාපීය වාණිජ මගී ගුවන්යානා මෙහෙයවීම සඳහා දෙපාර්ශවයම කටයුතු කරන ලදී.

ගුවන් තොටුපොළෙහි අනෙකුත් පහසුකම් ස්ථාපනය කිරීම ඇතුලු මෑතකදී සිදුකරන ලද පුළුල් කිරීමේ කටයුතු ශ‍්‍රී ලංකා රජය විසින් සිදුකරන ලදී.

එමෙන්ම, චෙන්නායී සහ යාපනය අතර වාණිජ ගුවන් ගමන් 2019 නොවැම්බර් මස මුල සිට ආරම්භ කිරීමට නියමිතය.