ජාත්‍යන්තර පොලීසියේ තොරතුරු පද්ධතිය වෙත සෘජුවම ප‍්‍රවිෂ්ට වීමේ අවකාශය ලබාගැනීමේ මූලික අරමුණ පෙරදැරිව 2006 අංක 6 දරන මුදල් ගනුදෙනු වාර්තා කිරීමේ පනතේ විධිවිධාන ප‍්‍රකාරව ශ‍්‍රී ලංකා මූල්‍ය බුද්ධි ඒකකය, 2019 ඔක්තෝබර් මස 11වෙනි දින ශ‍්‍රී ලංකා මහ බැංකු පරිශ‍්‍රයේදී ජාත්‍යන්තර පොලීසියේ කොළඹ ශාඛාව සමග ගිවිසුමකට එළැඹිණි.

ජාත්‍යන්තර පොලීසියේ කොළඹ ශාඛාවේ ප‍්‍රධානී, ජ්‍යෙෂ්ඨ නියෝජ්‍ය පොලිස්පති ඞී. ඩබ්. ආර්. බී. සෙනෙවිරත්න මහතා සහ මූල්‍ය බුද්ධි ඒකකයේ අධ්‍යක්‍ෂ ඩී. එම්. රූපසිංහ මහතා විසින් මුදල් විශුද්ධිකරණය සහ ත‍්‍රස්තවාදයට මුදල් සැපයීම වැළැක්වීමේ ජාතික සම්බන්ධීකරණ කමිටුවේ සභාපති, ශ‍්‍රී ලංකා මහ බැංකු අධිපති ආචාර්ය ඉන්ද්‍රජිත් කුමාරස්වාමි මහතා සහ වැඩ බලන පොලිස්පති සී. ඩී. වික‍්‍රමරත්න මහතා ඉදිරියේ මෙම ගිවිසුමට අත්සන් තබන ලදී.

මුදල් විශුද්ධිකරණය සහ ත‍්‍රස්තවාදයට මුදල් සැපැයීම යනු දේශීය හා ජාත්‍යන්තර වශයෙන් එකිනෙකට සම්බන්ධ වන මූල්‍ය අපරාධයන් වන අතර එමගින් දේශීය මෙන්ම ගෝලීය ආර්ථික සහ මූල්‍ය පද්ධති ස්ථායීතාවයට තර්ජනයක් එල්ලවීමේ හැකියාව ඇත. මෙම අවබෝධතා ගිවිසුම හරහා මුදල් විශුද්ධිකරණය සහ ත‍්‍රස්තවාදයට මුදල් සැපැයීම ඇතුළු අනෙකුත් නීත්‍යනුකූල නොවන කටයුතු වැළැක්වීමට, අනාවරණය කරගැනීමට සහ ඒ පිළිබඳ පරීක්‍ෂණ පැවැත්වීමට අවශ්‍ය වැදගත් මූල්‍ය බුද්ධි තොරතුරු හුවමාරු කරගැනීමට හැකිවේ.

මුදල් විශුද්ධිකරණය වැළැක්වීමේ සහ ත‍්‍රස්තවාදයට මුදල් සැපැයීම මැඩපැවැත්වීමේ රාමුව ශක්තිමත් කිරීම සඳහා, තොරතුරු හුවමාරු කරගැනීමේ අරමුණ පෙරදැරිව, ශ‍්‍රී ලංකා මූල්‍ය බුද්ධි ඒකකය මේ වනවිට විදේශීය පාර්ශ්ව 37ක් සමග මෙන්ම ශ‍්‍රී ලංකා රේගුව, ආගමන විගමන දෙපාර්තමේන්තුව, දේශීය ආදායම් දෙපාර්තමේන්තුව සහ පුද්ගලයින් ලියාපදිංචි කිරීමේ දෙපාර්තමේන්තුව, ශ‍්‍රී ලංකා පොලීසිය, ශ‍්‍රී ලංකා සුරැකුම්පත් හා විනිමය කොමිෂන් සභාව, ශ‍්‍රී ලංකා රක්‍ෂණ නියාමන කොමිෂන් සභාව, මෝටර් රථ ප‍්‍රවාහන දෙපාර්තමේන්තුව, සහාධිපත්‍ය කළමනාකරණ අධිකාරිය සහ ජාතික මැණික් හා ස්වර්ණාභරණ අධිකාරිය යන දේශීය ආයතන සමග අවබෝධතා ගිවිසුම්වලට එළැඹී ඇත.