2018 වර්ෂයේ සිදුවූ සිදුවූ වෙළඳ අස්ථාවරත්වය සහ වෙළඳ ආතතිය ලෝක බිලියනපතියන් කෙරෙහි කෙබඳු බලපෑමක් සිදුකළේ ද? UBS ස්විස් බැංකුව සහ PwC විසින් පළ කරන ලද වාර්තා 2ක් ඇසුරෙන් තබන විශ්ලේෂණයකි

සටහන : ධනංජි සමරකෝන්

වසර පහක වර්ධනයෙන් පසු, ලෝක බිලියනපතියන්ගේ සාමූහික ධනය සියයට 4.3කින් හෙවත් ඩොලර් බිලියන 388කින් පහතවැටී ඇති බව UBS ස්විස් බැංකු වාර්තාව සහ PwC වාර්තාවක දැක්වේ. මෙහිදී, 2018 වර්ෂය අවසාන වනවිට ලොව පුරා සිටි 2,101ක් වූ ගෝලීය බිලියනපතියන් ප‍්‍රමාණයෙන් 57ක අඩුවීමක් දැකගත හැකියි. එමෙන්ම, මෙම වාර්තා මගින් පෙන්වාදෙන පරිදි, ආර්ථික සහ මූල්‍යමය සිදුවීම් රාශියකගේ එකතුවෙන් සිදුවූ වෙළඳ අස්ථාවරත්වය සහ වෙළඳ ආතතියය මෙම පහතවැටීම සඳහා සෘජුවම බලපාන ලද හේතු ලෙස සඳහන් කළහැකිය.

බිලියනපතියන්ගේ ධනය බොහෝසෙයින් පහළගොස් ඇත්තේ ආසියානු කලාපයේ වන අතර එක්සත් ජනපද ඩොලර් වලින් ගත්කළ චීන බිලියනපතියන්ගේ ශුද්ධ වටිනාකම සියයට 12.3කින් අඩු වී තිබීම සුවිශේෂී වේ. මෙම අඩුවීමෙන් අඩක් පමණ සිදුවන්නේ එක්සත් ජනපද ඩොලරයට සාපේක්‍ෂව චීන යුවාන් අවප‍්‍රමාණය වීම හේතුවෙන් වන අතර චීනය මෙන්ම ඉන්දියාවේ ද සිදුවූ මෙම පහතවැටීමෙහි අවසන් ප‍්‍රතිපලය වූයේ, බිලියනපතියන්ගේ ප‍්‍රමාණයෙහි විශාලතම පහතවැටීම ආසියානු කලාපයෙන් වාර්තාවීමයි.

චීනයට පමණක් බිලියනපතියන් 48ක් අහිමි වූ අතර පසුගිය වසර අවසානය වනවිට එහි ඉතිරිව ඇත්තේ බිලියනපතියන් 325ක් පමණි. එහෙත්, තවමත්, ආසියාව යනු ලොව වැඩිම බිලියනපතියන් සිටින කලාපයයි.

විශේෂයෙන්ම, චීනයෙහි බිලියනපතියන් පසුගිය වසර පහ තුළ සිය ශේ්‍්‍රණිගත කිරීම් වේගයෙන් ඉහළ නංවාගෙන ඇති අතර එහි ප‍්‍රථිපලය වූයේ, උතුරු ඇමරිකාවෙන් පසු දෙවන විශාලතම බිලියනපතියන් සිටින රට බවට චීනය පත්වීමයි.

මෙලෙස ලෝක බිලියනපතියන්ගේ ධනය පහළවැටීමක් සිදුවුව ද ඉන් එක්සත් ජනපදයට උපරිම යහපත් තත්ත්වයක් උදාවි ඇති බැව් තහවුරු කරමින් මෙම වාර්තා මගින් පෙන්වාදෙනුයේ, එක්සත් ජනපදය සිය තාක්‍ෂණ ක්‍ෂේත‍්‍රයේ සාර්ථකත්වය හේතුවෙන් තව තවත් බිලියනපතියන් බිහිකරන්නට වීමෙන් ඇමරිකාවේ බිලියනපතියන් ප‍්‍රමාණය ඉහළයන්නට වූ බවයි. එනම් 2017දී, තාක්‍ෂණික අංශයෙන් එක්සත් ජනපදය බිහිකළ බිලියනපතියන් සංඛ්‍යාව 70ක් වූ අතර 2018 වසර අවසානය වනවිට එය සටහන් වූයේ බිලියනපතියන් 89ක් ලෙසිණි.

ඒ අනුව, ගෝලීය ආර්ථිකය අඛණ්ඩව ඉදිරියට ගෙනයමින් පසුගිය වසර පහ තුළ බිලියනපතියන්ගේ ධනයෙහි වර්ධනයෙන් තුනෙන් එකක් පමණ මෙහෙයවනු ලැබෙන්නේ තාක්‍ෂණ ව්‍යවසායකයින් විසිනි. එනම්, පසුගිය වසර අවසන් වනවිට තාක්‍ෂණික බිලියනපතියන් පමණක් ඩොලර් ටි‍්‍රලියන 1.3ක වත්කම් ප‍්‍රමාණයක් රඳවාගනිමින් ඔවුන්ගේ ශුද්ධ ධනය අඛණ්ඩවම වසර පහක් පුරා දෙගුණ කරගෙන ද තිබේ.

ලොව පුරා සිටින බිලියනපතියන් අඛණ්ඩවම ආධාර උපකාර කටයුතු සඳහා දායකත්වය ලබාදෙන අතර ඉන් ඉහළම බිලියනපතියන් 500දෙනාගෙන් 400ක් පමණ උපරිම ලබාදෙන බවද මෙම වාර්තා මගින් පෙන්වාදෙනු ලබයි. කෙසේනමුත්, මෙම ආධාර, උපකාර සැපැයීමේදී ඇමෙරිකානු බිලියනපතියන් ජාත්‍යන්තර සහ දේශීය ප‍්‍රජාව යන දෙපිරිස අතරම සිය දායකත්වය ලබාදෙන අතර යුරෝපීය බිලියනපතියන් ජාත්‍යන්තර ව්‍යාපෘති සඳහා ද, ආසියානු බිලියනපතියන් දේශීය වශයෙන් ද සිය දායකත්වයන් ලබාදීමේදී මූලිකව කටයුතු කරන බවද මෙම වාර්තාව මගින් තවදුරටත් පැහැදිලි කරයි.

ගෝලීය වශයෙන්, 2018දී, බිලියනපතියන්ගෙන් පරිත්‍යාග ලැබී ඇති ප‍්‍රමුඛතම ක්‍ෂේත‍්‍රය ලෙස අධ්‍යාපන අංශය පෙන්වාදිය හැකි අතර ඉන්පසුව පිළිවෙළින් සෞඛ්‍යය සේවා, සංස්කෘතිය, කලාව යන අංශයන් වෙත ලැබී තිබේ. එහෙත්, දරිද්‍රතාවය සහ පරිසරය වෙනුවෙන් ඔවුන් දක්වා ඇත්තේ අවම දායකත්වයක් වීම සැළකිල්ලට ගතයුතුය.