නෙදර්ලන්තය ලොව අංක එකේ පාපැදි රාජ්‍යය බවට පත්කරන්නට එරට රජය අනුගමනය කරන තිරසායී සංවර්ධන කි‍්‍රයාදාමයන් අප වැනි රටවලටත් භාවිතා කළනොහැකි ද?

සටහන: ධනංජි සමරකෝන්

ජාත්‍යන්තර වෙළඳාම කෙරෙහි දැඩි නැඹුරුවක් ඇති ඉහළ විවෘත ආර්ථිකයක් සඳහා ද ප‍්‍රසිද්ධ රටක් වන නෙදර්ලන්තය සිය නිවාසය සහ රැකියාව අතර දුර තරණය කරන්නට යොදාගන්නා ප‍්‍රධාන ප‍්‍රවාහන මාධ්‍ය වන්නේ පාපැදියයි. ලෝකයේ දැවෙන ගැටලුවලට මූලබීජයක් වූ කාබන් ප‍්‍රතිශතය අවම කිරීමටත්, එරට වැසියන් සෞඛ්‍යසම්පන්න මිනිසුන් බවට පත්කිරීමටත්, මාර්ග තදබදය අවමකිරීමටත් අවශ්‍ය කදිම විසඳුමක් ලෙස පාපැදියෙන් ගමන්බිමන් යාමට එරට වැසියන් ආකර්ශනය කරගැනීමට නෙදර්ලන්තය යොදාගන්නා උපායමාර්ගයන් සැබැවින්ම අගය කළ යුතුය.

භූගෝලීය වශයෙන් සමතලා භූමියකට උරුමකම් කීමත්, මාර්ග තදබදයෙන් වෙන්වූ නිදහස් සහ පුළුල් පාපැදි මංතීරු පැවතීමත් මෙරට මිනිසුන් පාපැදියෙන් ගමන්බිමන් යාම දිරිමත් කළ බව නොරහසකි. නමුත්, ඔවුන් ‘ලොව අංක එකේ පාපැදි රාජ්‍යය’ ලෙස හැඳින්වීමට තරම් මිනිසුන් පෙළඹවූ වටිනාම සාධකය වූයේ, පාපැදිය වෙත සිය වැසියන් ආකර්ශනය කරගැනීමට එරට රජය විසින් ගෙනයන වැඩපිළිවෙලයි.

බදුබරින් නිදහස් වීම සහ බයිසිකලයෙන් ගමන්බිමන් යාම අතර සබඳතාවයක් සකස්කළ නෙදර්ලන්තය එරට වැසියාට පාපැදියකින් ගමන්බිමන් යාම බදුබරින් නිදහස්වීමට හේතුවක් සැපැයුවේය. එනම්, සෑම කිලෝමීටරයකට පාපැදිය ප‍්‍රවාහන ක‍්‍රමය ලෙස භාවිතා කරන්නන්ට ඩොලර් 0.22ක (බදු රහිත) සැතපුම් දීමනාවක් හිමිවේ. එනම් බදු රහිතව, ඔබේ වැටුප් පැකේජය කෙලින්ම ඔවුන්ට ගෙවනු ලැබේ. ව්‍යාපාරික අරමුණු සඳහා තමන්ගේම මෝටර් රථයක් පදවන අයෙකු වෙනුවෙන් ගමන්කළ දුර ප‍්‍රමාණයට අදාළව ලබාදෙන මුදල මෙන්ම මෙය ද කි‍්‍රයාත්මක වේ. නමුත්, මෙහි මූලික කාරණය නම් පාපැදිකරුවන්ට රැකියාවට සහ ඉන් පිටතට යාමෙන් ද මුදල් උපයාගත හැකිවීමයි.

එමෙන්ම, තම සේවකයන් පාපැදියෙන් සේවා ස්ථානය වෙත පැමිණීම ප‍්‍රතිලාභ අත්කරදෙන්නක් වන අතර පැපැදි මගින් ගමන්කිරීමෙන් විශේෂයෙන්ම සේවකයින්ගේ සෞඛ්‍ය තත්ත්වය යහපත් වනවා පමණක් නොව සමාගම්වලට සිය සේවකයන්ගේ වාහන නැවැත්වීමට අවශ්‍ය පහසුකම් සැලැසීම වෙනුවෙන් යන පිරිවැය ද ඉතිරිකර ගතහැකි බැවින් නෙදර්ලන්ත රජය නිරන්තරයෙන්ම සේවායෝජකයින් දිරිමත් කරනුයේ පාපැදියෙන් ගමන් කිරීමට අවශ්‍ය පහසුකම් සේවකයින් විෂයෙහි ලබාදෙන ලෙසයි.

මිනිසුන් තම මෝටර් රථවලින් ඉවත් කරගැනීමට සහ පොසිල ඉන්ධන වෙනුවට පෙඩල් බලය භාවිතා කිරීමට මූල්‍ය දිරිගැන්වීම් ලබාදෙන එකම රට නෙදර්ලන්තය නොවන බව සැබෑවකි. එනම් මෙවැනිම බදු රහිත පාපැදි මිලදීගැනීමේ ක‍්‍රමයක් බෙල්ජියමේ ද ක‍්‍රියාත්මක වන අතර එහිදී පාපැදිකරුවන්ට කිලෝමීටරයකට ඩොලර් 0.26ක ගෙවීමක් ලබාගත හැකි අතර එක්සත් රාජධානියේ, ‘සයිකල් ටූු වර්ක් යෝජනා ක‍්‍රමය’ යටතේ සේවකයින්ට තම සේවායෝජකයා හරහා වට්ටම් සහිත පාපැදි සහ උපකරණ ලබාගැනීමට ඉඩ සලසමින් ලීසිං ටූ මොඩලයක් ද ක‍්‍රියාත්මක කරයි.

එමෙන්ම, නෙදර්ලන්තය භාවිත කරන තවත් උපක‍්‍රමයක් වන්නේ රට පුරා විසිර සිටින මෝටර් රථයෙන් ගමන් කරන්නන් පාපැදියෙන් ගමන් කරවීම වෙත ආකර්ශනය කරගැනීමට ප‍්‍රදේශ ගණනාවක උපරිම කෙටි කාලයක් තුළ පැපැදිය ධාවනය කරන සෑම කිලෝ මීටරයක් සඳහාම මූල්‍යමය ත්‍යාගයක් පිරිනැමීමයි.

පාපැදියෙන් ගමන්ගැනීම තවදුරටත් දිරිමත් කිරීමට සුපිරි අධිවේගී මාර්ග නිර්මාණය කරන්නට ද අමතක නොකළ නෙදර්ලන්තය නගර තුළ පමණක් නොව නගර අතර දුර ද පැපැදියෙන් තරණය කරන්නට සුපිරි අධිවේගී මාර්ග 25ක් පමණ දැනටමත් ඉදිකරමින් පවතියි.

නිසි බයිසිකල් පහසුකම් සැපැයීමට නම් පාපැදිකරුවන්ගේ හැසිරීම පිළිබඳ වැඩිදුර විස්තර අත්‍යවශ්‍ය වන බැවින් ‘ජාතික පාපැදි ගණන්කිරීමේ සතිය’ නමින් වෙබ් අඩෙවියක් (ලන්දේසි භාෂාවෙන් පමණක්) නෙදර්ලන්ත රජය විසින් පිහිටුවා ඇති අතර මෙම සතිය තුළ, පාපැදිකරුවන් ඔවුන්ගේ ජංගම දුරකථනවල විශේෂ යෙදුමක් ස්ථාපනය කර භාවිතා කරයි. ඒවායේ වේගය, ඔවුන් ගමන්කරන මාර්ගය, ඔවුන් සකී‍්‍රය වන වේලාව සහ ප‍්‍රමාදයන් පවත්නා ස්ථාන මෙහි සටහන් වේ. පාපැදිවල යටිතල පහසුකම් වැඩිදියුණු කළයුතු ගැටලු සහ ස්ථාන හඳුනාගැනීමේදී මෙම තොරතුරු බෙහෙවින්ම වැදගත් වේ.

ගෝලීයකරණය, තාක්‍ෂණය ආදී අතිවිශාල කතිකාවත් තුළ සංවර්ධිත සහ තාක්‍ෂණික රටක් පොසිල ඉන්ධන වෙනුවට පෙඩල් බලය භාවිතා කරමින් තිරසාර ලෝකයක් සැකැසීම වෙනුවෙන් සකස්කර ඇති මෙවැනි උපාය මාර්ගයන් සෑම රටකම සංවර්ධන ව්‍යාපෘතීන් තුළ අඩංගු කරන්නේ නම්, සුඛෝපභෝගී නොව ‘ලොව සතුටින්ම සිටින මිනිසුන්ගෙන් පිරි රටක් වන්නට බොහෝ කාලයක් ගත නොවනු ඇත.